Nia nova manifesto

Antaŭ unu jaro ni lanĉis ĉi tiun blogon, eksplicite esprimante ke ni celas ne iun specifan feminismon, sed male akceptas ĉiujn ĝiajn diversajn specojn kaj flankojn. Samtempe ni antaŭvidis, ke ni certe lernos kaj ke niaj opinioj uruevoluiĝos. Kaj vere: nia unua jaro estis ege riĉa: ni ĉiuj multon lernis kaj laŭŝtupe kreskis – kaj ni faris tion kune, dank’ al reciproka diskuto kaj interŝanĝo de ideoj. Tiu ĉi proceso, samkiel la fakto ke kelkaj el vi, niaj legantoj, esprimis ke al vi mankas plispecifigo de niaj celoj, gvidis al tio ke ni trovis nian specon de feminismo kaj ellaboris la ĉi-suban novan manifeston de Egalecen. Ni pensas ke ĉi tiu nia nova sinteno certigos veran diversecon pli efike. Kompreneble, daŭre validas, ke ankaŭ dum nia ĵus komenciĝinta nova jaro ni kune lernos kaj evoluiĝos, kaj ni tre antaŭĝojas tion!

Nia nova manifesto

Ni estas kolektaĵo de Esperantistoj, kiuj celas blogi pri pluraneca feminismo en Esperanto. Ni esperas, ke per nia blogo ni povas antaŭenpuŝi Esperantujon al la nivelo de socijusteca komunikado kaj interkompreno de aliaj neesperantaj feminismaj rondoj. Pli eksplicite, ni kredas:

• ke formoj de subpremado interligiĝas, kaj bezonas esti analizataj de nuancita vidpunkto
• ke la plej bona informanto pri iu subprema sistemo estas homo, kiu mem estas viktimo de ĝi, kaj ke ni nur transprenu tiun rolon kiam absolute necesas kaj ni verku surbaze kaj informite de diraĵoj/skribaĵoj de homoj de tiuj grupoj
• ke ĉiu rajtas kontribui al la blogo kaj la diskutoj, sed nur se ri respektas la spertojn de subpremataj homoj kaj kredas je la rajto de subpremataj grupoj difini identecon por si mem
• je pli bona Esperantujo, kiu forlasas kaj kondamnas Eŭropcentrismon, rasismon, kvirfobion, handikapismon, kaj aliajn specojn de malegaleco
• je graveco de transnacia perspektivo kiu ne nur inkluzivas diversajn landojn kaj regionojn de la mondo, sed ankaŭ pritraktas mondajn asimetriojn de povo kaj malkonstruas koloniismajn pensmanierojn

Se vi konsentas kun la supra manifesto kaj volas kontribui al nia blogo, vi estas bonvena sendi vian proponon al egalecen@gmail.com.