La teamo de Egalecen ĉeestis SES (Somera Esperanto Studado), ĉifoje en Martin, Slovakio, kaj ni multe agadis tie. Jen en la suba video vi povas vidi pri niaj programeroj, kiujn ni ankaŭ rapide klarigos ĉi tie. Baldaŭ estos IJK (Internacia Junulara Kongreso), kaj ni planas tie ripeti kelkajn de ĉi tiuj programeroj, kaj ankaŭ fari iujn aliajn, do se vi volas gustumi ilin antaŭe, certe plu legu!
GLAT-renkontiĝo
Ni okazigis etan renkontiĝon por GLAT-aj (LGBT) homoj, kiuj ĉeestis la aranĝon, por ke ni povu konatiĝi kun unu la aliaj kaj priparoli niajn spertojn pri esti GLAT-a/kvira en Esperanto aranĝoj, kaj ĝenerale en la vivo, kaj krei celojn kaj planojn pri kiel plibonigi la situacion. Ni estis produktivaj kaj havas nun mojosajn novajn ideojn pri kiel plimodernigi E-aranĝojn tiurilate.
Diskutrondo pri normoj kaj privilegioj
En ĉi tiu diskutrondo ni komune priparolis kelkajn konceptojn (ekz. normoj, privilegioj, diskriminacio, pluraneco, ktp.), kaj fine ankaŭ kiel ili rilatas al Esperanto. La diskuto estis vigla, respektoplena kaj plurperspektiva.
Radikalaj manartaĵoj
Kune ni kreis belajn artaĵojn, ekz. brakringojn kun la vorto ‘Egalecen’ kaj forstrekajn poemojn (poemoj, kie vi prenas iun jam presitan materialon kaj forstrekas vortojn por krei poemon). Pro ekskurso ni ne havis multege da partoprenantoj, kaj ni ŝatintus artumi eĉ pli longe, kaj kun pli radikalaj mesaĝoj, do ni planas jam, ke niaj manartaĵoj en IJK estu des pli bonaj!
Feminisma verkado
Denove pro ekskurso mankis al ni homoj, sed ni tamen havis interesan diskuton pri seksismo en (ne nur) Esperanta literaturo, kaj kundividis ideojn, pri kiel oni povus verki pli feminisme en Esperanto.
Vojaĝo en la mondo de celiakulo
Manuela prezentis lerte kaj amuze pri sia vivo kiel celiakulo – de ekscio pri sia malsano, al la efikoj de ĝi je ĉiutaga vivo, kaj ankaŭ tra oftaj mitoj pri ĝi. Ĝi estis tre informdona kaj bele ligiĝis kun la temoj de antaŭsupozado, diskriminacio, kaj privilegio, kiujn ni traktis en aliaj programeroj.
Egalecen sin prezentas
Egalecen fondiĝis antaŭ unu jaro la 18an de julio, do ni festis la datrevenon de la blogo (kun kuko kaj Kofola!) kaj prezentis pri la blogo, enkondukante nin kaj nian novan manifeston kaj diskutante nian agadon dum la pasinta jaro.
Egalecen 
Saluton, gekaraj!
Mi multe ĝuis viajn programerojn dum lasta SES, kaj mi gratulas kaj dankas vin pro tio. Tamen, mi nur volis komenti unu afereton por helpi vin plibonigi viajn intencojn, se vi volas fari tion.
Mi ŝatas vian difinon de egaleco, kaj ankaŭ mi kredas, kiel vi, ke subpremado malofte ekzistas en ununura vivaspekto. Male, la celoj de subpremado ŝajnas esti vere interligitaj. Okazis io la antaŭlastan tagon de SES dum via prezentado kio bone klarigas ĉi tion: maljuna homo kiu taksis sin mem kiel handikapula, plendis pri malfacileco de sia vivo kaj pli manko da helpo. Ĵus post ĉi tio, la sama homo demandis kie la informoj pri Egalecen troveblas. Ni ĉiuj antaŭvidis la respondon: en la blogo kie vi skribas. Bone. Sed la homo rapide plendis pri sia nekapableco, sia retalirmalebleco, fakte.
Do, ĉi tiu anekdoto montras, laŭ mia opinio, gravan nuntempan problemon de egaleco: junaj eŭropaj homoj vidas reton kiel perfekta rimedo kundividi opiniojn kaj ankaŭ plialtigi kapablojn de subpremataj homoj. Tamen, la perfekta rimedo ankaŭ povas iĝi perfekta aldono al subpremantaj rimedoj ĉar iel ĝi iĝas barilo inter du generacioj… kaj ankaŭ inter pli kaj malpli disvolviĝintaj landoj. Ŝajnas paradokso… kaj ĝi vere estas, kaj ankaŭ grava problemo.
En via difino de pluraneco aperas, tute ĝuste, la konceptoj de “raso, genro, seksuma orientiĝo, ktp.”, kaj mi bone komprenas ke ne eblas fari liston kiu enhavas ĉiujn trajtojn per kiuj uloj povas memdifini. Fortune kaj feliĉe homoj estas mirinde malsamaj. Tamen, ŝajnas al mi ke aĝo iras pli kaj pli supren nuntempe en la ŝtuparo de malegalecaj trajtoj, kun aldono da novaj limo kreitaj de teknologio.
Bonvolu ne konsideri ĉi tiun komenton kiel malbona kritikaĵo. Male, mi kredas ke via agado estas pozitiva kaj multe utila, kaj pro tio mi decidis atentigi vin pri ĉi tiu problemo. Kion mi sugestas? Bone, eble nur atentigi pro aĝo kiel grava fonto de malegaleco kaj subpremo, kaj inviti vin disdoni informojn pri Egalecen ne nur rete sed ankaŭ fizike en tiom da renkontiĝoj kiom vi povos ĉeesti, kaj eble per presita materialo. Mi bone scias ke vi JAM fizike informas pri Egalecen en renkontiĝoj. Do, la sama komento celas nur danki vin pro tio kaj instigi vin energie daŭrigi vian agadon.
Amike,
Major Tom.
ŜatiŜati
Dankon pro via komento, gxi certe estas bonega propono kaj ni strebos ankaux disdoni paperajn informilojn, artikolojn ktp. Ankaux ni ja devas pli zorgi pri agxismo en nia agado.
ŜatiŜati